(周四)聞結束辯論之後

有朋友一早來訊勁讚鄙人分析預測拉布戰的網文，可能係香港唯一分析最深入、最接近事態真相的系列文章，尤其是「三子拉布的Terminator可能是老曾」一句，令人拍案叫絕，云云。我話我都係亂估，冇內幕，冇同人傾過，都算係咁。

我總結前文分析及預測的重點：
●中港政治矛盾，多年觀察到香港激進派的本質。拉布戰係延續變相公投和中央政治博弈行動。

●中央被迫在政治博弈下，從「香港法律控制中央政治」(泛民慣常手法)的被動下，轉而自己也玩玩「以法制政」的手法。

●拉布戰可能是中央/港府/建制派的氹雞，引市民注視拉布戰的為害。(理由係冇一個建制派議員抗議曾鈺成的通過千二條修訂)。拉布黨無底，中央有底(方法我唔知)。

●人社三子拉布黨沒有政治風範，不必要地屈辱對家及官員。

●曾鈺成力壓人社三子，三子拉布的Terminator可能是老曾。老曾是建制派，熟識政治，知點做。但不排除老曾為求直聲，會婦人之仁，被拉布拖落去。

●議會外，建制和拉布黨角力展開公關戰的，居然係侯任特首梁英。

●第二次流會，中央似控制不了建制派議員。拉布黨聲勢大增。

●拉布戰的成敗是中央的决心，曾蔭權講話(周一)是端倪。16晚(周三)通宵辯論是決戰時刻。

●拉布黨的勝算係其他泛民議員加入拉布。

(1)
1008

(六)拉布戰---
郁民俾條側頭佬輾到攤攤腰

我唔敢認屎認屁，話會估到曾鈺成會點。琴日一直睇NOW直播，悶到嘔，到半夜直情轉去睇電影(兩邊襟)。萬萬想不到，到04:30到老曾來個深夜大屠殺，來個sudenly terminator！此前，拉布黨新人加入，來勢汹汹，老曾似節節退讓，尤其是李卓仁政治控訴個一段。當時我心諗，老曾莫非失控？莫非會違犯中央/港府/建制派的政治目標---捍衛中央/港府的管治權威？會被香港激進派玩落去？

我完全唔識議會規程，想不到刀鍘會係92條！本人驚愕之情(04:30)同吳譪儀、長毛、大舊等不相上下。觀看直播，當時令我震動者，係老曾的滋柔淡定如昔，而郁民則綣縮座中，頹疲畢露。我feel到，郁民之深受挫折，前所未有。因為郁民之前仲牙斬斬潤「老曾生日，捱通宵，不如休會啦！」點知若干小時後，老曾就落鍘。郁民俾條側頭佬輾到攤攤腰，可謂人生奇恥大辱----以後點牙擦都冇用。毋庸諱言，郁人有江湖味道(非江湖人)，牙擦是至尊。

第二日(今天)總結發言，郁民破口大罵。恕我冒犯，只不過是一隻被貓兒戲弄的老鼠---老曾依然在座上咪咪咀笑。年紀大的看倌當知道，這一鑊拉布戰除了政治戰(鬥氣)之外，我認為，其實香港塘水滚塘魚，亦同時係呢一班老嘢鬥威鬥意氣的平台。我想，郁民大概恨不得回復名咀的處境，何苦要來立會受苦(生理上)及受辱。

第二日(今天) 郁民鬧老曾「老妓從良」(希望我冇聽錯)，只不過是色厲內荏。Btw，已有網友指出郁民此比喻不倫不類。好多人都知道，「老妓從良」係李敖2000年時支持宋楚瑜選總统的理據。郁民唔只比喻不倫，直情將意思講相反咗。有兩層，第一，「你雖然係共產黨，我十幾年來信你係好人，點知到頭來，插我一刀…」，這個refer to「我有眼無珠」掛。網友指出，老曾始終係共產黨，同「老妓從良」有乜關係？第二，郁民係咪short咗，「老妓從良」係指臨老矯正身份，而老曾作為似是「最後露出本來真面目」(郁民觀點) ，剛相反噃。怪不得老曾在座上咪咪咀笑，貓戲老鼠，懶得理佢。

後注：後一段有誤，近來偶然聽返郁人錄音，郁人的意思係指曾x成"晚年失節'，非「老妓從良」。

(2)

(六)拉布戰---結束辯論之後

返聽15/05周二《毓民踩場》，郁、梁、陳三人對用拉布隊冧政府的前景，均信心滿滿。尤其是梁粉，是激進派大好友。大舊反而講出「主席權力好大，分分鍾一下子清我地場…」的話，但佢講的是a主席，不是曾鈺成the主席。郁人更加唔使講，當晚對老曾後來變臉殊不為意，假如叫D馬仔稍為瞄下本欄(前文) ，稍存驚惕之心，周三晚就唔使輸得咁樣衰。班人成日怱視中共/央的決心，兩年前變相公投時亦如是，老消的口頭禪：「中共唔知點做好…，權鬥…，對香港失控…」，傻佬語言當有料到。

(3)

(六)拉布戰---結束辯論之後

估測曾鈺成周三落鍘結束辯論的前因：

●(1版)一早有預謀，由中央决定及策動，經西環甚至繞過西環直達老曾，Plan好點打呢場拉布戰。曾蔭權唔知，梁英更加唔知。建制派議員除一二人之外，通通唔知。但大致上收到老曾「最後會搞掂」的暗示，所以才有千三條修訂通過而沒有人抗議的情況。策略是苦肉計：訴民意牌：陰柔對付；以法制政。

●(2版)不是由中央决定及策動，但越來越唔對路，民意亦一半一半，所以二次流會之後(10/05)，叫老曾搞掂，做嘢。

●(3版)由頭到尾不是由中央决定及策動，但老曾知道中央立場。就好似老曾自已講的，經多方考慮，根據會章，運用主席酹情權，動手落鍘結束辯論。

●假如第一項成立，中央同老曾施展苦肉計，俾拉布黨玩夠去，泄下憤，而且主要俾全港市民知道拉布的種種。最到point的是(建制派觀點)，梁英說的「搞政治」，綱舉目張。但我認為老曾04:30落鍘結束辯論，還是比較粗糙，應該拖到周四早上，大家筋疲力盡時，經過稍稍辯論，才施行92條！

●我同意「周三新人加入拉布黨，聲勢大增，而民意一半一半，中央&老曾要做嘢」的推測。

●梁英唔知老曾這個策略。激進派屈梁英是幕後黑手，是bullshit！用吓腦諗吓，假如係梁英可控制老曾，都唔會蠢到咁急出聲，唔會蠢到公開潤老曾「姑息」拉布黨。(相等於人力話有黑幫人士反拉布，就話梁英係黑幫特首一樣咁無聊)

●曾蔭權周一(14/05)公開反擊拉布黨，表示中央的决心，曾蔭權縱有玩梁英之心，但運作上亦做唔到(拉布黨Ｂ隊？no kitting!)

●啱啱聽到陳健波的「曾鈺成有心理缺陷，有原罪缺陷，身為前民建聯主席，所以姑息拉布黨，點知仲治絲益棼…」的話，幾好噃，我諗唔到呢一點！

(4)

(六)拉布戰---結束辯論之後

啱啱諗到，建制派的謝偉俊表現越來越好(建制角度)，硬淨過土共派百倍，他下一屆會更上一層樓。

曾鈺成呢一鋪臨天光賴尿(對比三年多表現)，兩邊不討好。謝偉俊罵他"犬儒"(高級鄉愿)，一語中的。恐引起建制派議員對曾壓不住激進派的憂慮，這一點，非土共派的工商派議員憂慮猶甚---下一屆又咁俾二三激進派議員咁玩，就大鑊。

由是，老曾下一屆未必會選得上主席，俾劉健儀坐正，激進派就大鑊。

(5)

幾乎漏咗講，我先前完全想唔到中央/港府/建制派點樣解決拉布戰，但damn sure中央/共決心會去還擊兼拿下。

睇咗第一次拉布戰，feel到老曾會是三子終結者，用乜方法我唔知，大概用趕人方法吧，估唔到最後會用92條！

現在回想，可能估大咗老曾的能量，或者謝偉俊係啱嘅，老曾可能係犬儒，即我所說的：婦人之仁！謝說老曾"好人"無好報！誠然。