梁英(本身)大鑊

admin

(補談)梁英(本身)大鑊(1)---僭建

壹仔話梁英僭建係自焚，但點解會咁做？相信世界上冇一個人清楚梁英點解會咁做。歷史上有好多不可解的謎，1940年德軍催枯拉朽將英國遠征軍迫至敦苟克彈丸之地，包圍起來，希特拉竟然下令time out，過了七八天，放生卅多萬英軍回國，幾年之後回來打返自己。1966年老毛將劉鄧打倒，竟然冇將鄧小平開除黨籍，共和國史從此改寫。

梁英why要僭建，尤其是after唐宮之後。唐宮都話值半億，幾個花棚算乜嘢錢？大哥，一參選就好拆啦，或者，報紙登之前就好拆啦，咁你豈不是仲蠢過唐唐。梁英僭建門最大鑊之處尚不是誠信問題(俾人知道就大鑊)，而係世人洞悉梁英竟然是一個苯七人(原因仲未明)。又何來是狼英？簡直是一隻苯牛----真係只淨返勤力一項。市民反對、隊冧黨狂隊都唔係問題(阿爺唔炒就冇事)，俾班屬下官員睇小才大件事，跛脚跛在這裡，除非梁英有鑽石般的意志---佢講過對自己都好失望，希望佢唔好散。

我是民主融共派，但從來不會景仰政治人物(年輕時又不同)，之前對梁英冇乜感覺，無愛無恨，但對新政府有期望，對梁政綱有期望。然而僭建門一出，我也睇小梁英了。今年，李旺陽事件同僭建門係有利於民主派轉勢的事件。前幾日，我和朋友談起林鄭接任特首的可能性。

林鄭之後温言叫梁英交代以及良心說，我嚇了一跳，這已是反意，冇乜人著墨呢一點。八噏消居然反鋤林鄭護梁，消氏真係反梁反到short咗，退晒步。

admin

梁英(本身)大鑊(2)---落區(A)

梁英大鑊之二係落區政策。前貼我已經講過，唔好制，點知梁班子嚟真。穌虾仔都知道正常的工作倫理：大人不做小孩事。第一次落區翌日，曾班子前軍師劉細良就譏諷其為「區議員水平」，一語中的。我成日鋤消氏，但消氏話梁英落區，猶如扮演「上訪局局長」(地方級)角色，比「區議員水平」更貼切。葉劉好似也彈過梁英落區。

大人做小孩事，有乜唔妥呢？且聽我閒聊。

N年前睇歷史書，謂，某宰相出巡，坐車中飬神前進。路經市集，發生火警，待下奔告。宰相閉目不語，驅車續進。良久，市集那邊發生砍人事件，宰相照樣理。車子繼續前進。未幾，宰相突然聽到一種蟬叫聲。宰相張眼，霍然而起，下車，找出蟬叫的樹枝，仔細觀察這種蟬的叫法。原來蟬的叫法預測到天氣，而天氣的變化會影響到收成，收成會影響到民生，宰相才大顯周章。呢個故事指出，乜嘢叫做大事，高官應持乜嘢一個態度。

啱啱翻睇《走向共和》，第一場的Drama和上述故事一模一樣：李鴻章據桌施施然在吃魚，晝外音屬下一一報出軍國大事，李鴻章繼續施施然聽著，到晝外音話：「準備呈送俾太后的鸚鵡疴D屎顏色有問題…」，李鴻章悚然而驚，停箸….。

梁英，梁英，你唔應該哂時間去聽一個婆頭投訴申唔申請到公屋，而應該關注大事，應該去諗嘢而唔使做嘢的。

又有一個名著，某縣有老牙差，開庭時位列班未，但威名遠播，皆因善於判定每一任縣官的優劣By開庭，他老兄的方法是﹕以火水捧的擺法正反為判定。某一任新官開庭審案，為兩個村民偷雞案作出審判，新縣官自問問案條理分明，大公無私，判案果斷明快，村民兩造皆大歡喜而去。案畢，新縣官瞄向班未老牙差如何set火水捧:竟然是翻轉擺！即係唔合格！新縣官不服，微服夜訪老牙差，問個究竟。老牙差話：「你老味，係人都知道呢Ｄ鷄皮蒜毛的事，唔值得花時間去審啦，難為你仲審得津津有味！」此故事指民間智慧勝於昂書生。香港人睇到梁英落區「審狗屎」，相信亦有同感。

admin

梁英(本身)大鑊(2)---落區(B)

關於前面說過多次的「唔使做嘢..」，係咁的：小弟年輕時任片場工作，由場記升級為副導(《吸毒者》-姜大衛)，第一天現場埋位，竟不知所措，走去幫場務手搬道具，馬上被當時的製片醒帆叔喝住：「你係副導，唔使做嘢的！」----我初嘗「唔使做嘢..」的哲學。當然，副導「唔使做嘢..」係指不在其位不謀其政，副導有時會做到隻狗咁(就現場走動論)---「俾視線」、「餵對白」、「做替身打燈」…等，另話。而今天的梁英不只不是副導，且是導演(比喻)，仲走去做場務的工作(比喻)？(注：片場其實冇副導，只有助導。副導和導演是冇得比較的。副導尤如今天的初級AO，和CO係冇得比較的)

梁英已是特首，偶一親民的政治公關可以做下的，但唔需要做民政專員的工作，定定地坐係禮賓府(?)顯示你把持住香港呢條船的大方向則成，唔使走落機房汗流夾背地剷炭燒火的。梁英可能無睇過日本片的「風林火山」，陣前大將軍的作用是動如山的坐在那裡注視戰場(幾個大將凝坐的鏡頭，至今難忘)，讓靡下千軍萬馬看到你不動如山(中國古代亦有大臣城頭上中火矢而不後退半步的故事。)不是看到你落區被激進民眾沖激---「兵敗如山倒」(梁英當時應落車面對民眾，永遠不要被動)。吊詭的是，近周替政府扮演動如山的角色卻是林鄭。

再講一單，近閱《鄧小平時代》一書，描述六四之後一年半，鄧小平出來接待外賓時，一再闡釋政策時的冷靜堅毅的表情。鬼佬作者大讚老鄧的統治技巧：一方面要為政不用多言，鴨子划水式擇善固執的施政，一方面要做好政治公關，鄧小平表現的也是不動如山。不過咁，做政治公關都要大老倌式咁點到即止就夠，唔係好似而家梁英咁，好似咖喱啡咁周周落區做戲。而家好似前綫消防員咁焦頭爛額，笑九死D消防局局長(前朝曾班子官員)，大鑊。(注：煲呔曾好少露面，唔係不動如山，而係hae做)

william.c

梁英(本身)大鑊(2)---落區(C)

或謂落區下鄉便於直接探取人民訴求，但這是攞嚟講的。看李敖書，我佩服他駡蔣經國的「親民」工作要注意，當時小蔣係威權人物，唔使競選。或許這是現代的一種公關政治的需要，但你睇戴高樂會唔會咁做(連記者都不搭理的)，老毛更睬你都傻。與人民保持距離偏偏係一種建立權威的方法---當然你首先要做好政績先。假如人民唔蘇自己，就下台(戴高樂就係咁)。to lead，唔係做阿四，OK？「親民」係選舉工程，非施政方法。政府的下情上達，唔係用咁嘅方法。

我諗梁英可能係學咗大陸個一套，大陸落區個一套有N咁多種形式同內涵，而且有D過時，冇人再做。最早的是老毛的「接近群眾，取消官僚主義」，這是政治上的。我係深圳郵局就見過一個局長做接待員，你老味，前面樹有「局長值班」的牌子，完全是形式主義。另一種是大官下鄉勞動，是處罸性質，如鄧小平係江西茂了三年。另一種係落區調查研究，叫調研。文革之前，叫蹲點，如王光美蹲點清華---又唔係工作組噃。調研有點兒密秘出巡查訪的性質(現今大陸正規行政程序)。馬英九淨係識瞓農社(2008年選舉時)，唔識調研，結果肥仔林係南部係人都知他貪污，獨他和他的團隊不知。而家梁英應調研一下他的政敵(一笑)。首長落區參訪事物則是增長感性認識，如參觀工廠或巡劏房等，但都離不開公關政治範疇。而大陸都不與與民對話的---both解决問題及做show，除非特發事故。

現今梁英落區，最恐佈的地方係佢自已唔當係一種公關政治，而真係認為係一種有效的行政管理！！！做落去，不只俾人小，而且累街坊(下屬)。或者改變形式及次數好D。每個禮拜每個禮拜咁落區，係人都厭，夠膽就次次同街頭示威群眾對話。